Larrialdi humanitario baten aurrean (gerra, lurrikara, uholdea…), prest zaude nola edo hala konprometitzeko.
Koordinakundean, laguntza emateko gogoz dabiltzan pertsona konprometitu askoren deiak jasotzen ditugu, baina ez dakite oso ongi nola.
Oro har, ondasunak eskaintzen dizkigute jenerotan, edota are gehiago, herrialde horietara boluntario joateko gogoa adierazten digute.
Halakoei erantzunez, argitu nahi dugu halako egoeretara jendea bidaltzen duten erakundeek langile espezializatuak bakarrik igortzen dituztela, larrialdietan berezko prestakuntza dutenak.
Bestalde, hala GGKEek nola agentzia humanitarioek diru laguntza besterik ez dutela eskatzen, horrek kit estandarizatuak erosteko aukera ematen duelako, bai han bertan, bai inguruko herrialdeetan, erosten diren gauzen egokitasuna bermatzeko, aldi berean tokiko ekonomien suspertzea eraginda.
Era berean, gomendatzen dugu informazioa jasotzea, iturri alternatiboetara joz; bereziki, kasuan kasuko errealitatearekin harreman zuzena duten erakundeetara. Kontuz desinformazioarekin; egizu ihes estereotipoetatik eta lagundu kontzientzia solidarioa sortzen zure ingurunean.
Nola lagundu jakiteko dekalogo humanitarioa
EKINTZAILETZA HUMANITARIOA
- Borondate ona izatea ez da beti nahikoa. Lagundu behar baduzu, ziurtatu baliagarria den zerbaiten bidez izanen dela;
- Pentsatu dohaintzen kostuan-onuran: adibidez,dohaintzan eman behar duzun gauza horrek justifikatzen ote duen hartzaileenganaino eramateko garraioaren kostua;
- Eta jakin behar duzu oso erraza dela erremedioa okerragoa izatea gaixotasuna baino; ez egin kaltegarriak izan daitezkeen ekintzak.
- Ez suposatu larrialdia izateagatik denak balio duela, duintasuna bizitza bera bezain garrantzitsua da;
- Tratatu helduak helduak bezala, larrialdiak ez die heldutasuna kendu;
- Zaindu zure emozioak, lankidetzan aritzeak nagusitasun sentsazioa sortu ohi du. Errespeta itzazu lagundu nahi dituzunak, egiten duzun guztiaren erantzule zarela ulertuz;
- Boluntario lana egiteak ez du esan nahi erantzukizunik ez dugunik. Aitzitik, lan arloko legeek baino indar handiagoarekin konprometitzen zaitu: bete zure konpromisoak;
- Egoera larrienek bere horretan diraute kazetariek eta komunikabideek unean uneko albistetik alde egin ondoren. Ez dago zertan estutu, bihar ere zure laguntza baliagarria izan daiteke;
- Bilatu aholkularitza, ekintza humanitarioak ere baditu eskura nola lagundu lagunduko dizuten profesionalak;
- Eta mesedez, egiaztatu iturria, ez birbidali mezu faltsurik edo ez egin ekintza bortitz edo iraingarrien apologiarik.